Mas marikas an utang kan mga Pilipino na nagdadakula kaysa sa kita. Segun sa Financial Stability Coordination Council (FSCC) an pagiging “Imbalance” pwede na makaapektar sa households resilience orog na sa economic shock na pwede magresulta nin negatibong epekto sa banking system.
Sa report kan FSCC kan 2025, an mga pautang sa tingi naglangkaw nin mga 15.7% taon-taon poon 2021 sagkod 2025. An mga unsecured credit, arog kan mga credit card asin mga pautang sa sweldo, mas marikas pang nagdakula, na nakaabot sa 27.7%.
Sa ibong na lado, an kita kan pamilya naglangkaw sana nin 5.8 % sa parehong panahon. Bilang resulta, an utang mas marikas na nagdadakula kisa sa kakayahan kan mga tawo na kumita asin bayadan an saindang mga obligasyon.
Susog sa report, an mga unsecured loans yaon sa pinakahalangkaw na lebel asin mas marikas an pagtalubo kisa sa ekonomiya. An mga credit card receivables nag-aako nin 30.9 porsyento kan mga pautang sa mga konsumidor asin nakahiling man kan pinakamarikas na pagtalubo sa nakaaging anom na taon.
Saro sa mga rason kan paglangkaw kan pangutang iyo an paglangkaw kan bilang kan mga hoben na trabahador asin mas madaling pag-access sa credit nin huli sa paggamit kan cashless payment systems. Nakatabang ini sa pinansyal na inklusyon alagad nagbukas man nin mas dakol na oportunidad para sa pag-utang.
Ipighiras man kan FSCC na an mga bangko mas nagtututok sa mga produktong pagpapautang sa mga konsumidor na nagtatao nin mas halangkaw na ganansya para sa sainda. Mantang igwa ining mga benepisyo, an konseho nagpapatanid na ini pwedeng magdara nin mga peligro sa kakayahan kan mga tawo na magbayad nin mga pautang asin posibleng makaapektar sa estabilidad kan sistema pinansyal sa maabot na panahon.
