Padagos na napapaatubang an sektor nin agrikultura kan nasyon sa hababang presyo kan bagas, na buminagsak sa mga ₱17 kada kilo sa nagkapirang probinsya arog kan Laguna. Sa ibong kaini, mantenidong halangkaw an presyo kan paroy sa merkado, poon ₱50 sagkod ₱53 kada kilo huli sa pig-implementar na price cap kan gobyerno.
Sa intrevista kan Bombo Radyo Naga ki Cathy Estavillo/ Bantay Bigas, sinabi kaini na nin huli sa dakulang gap sa presyo kan farmgate asin retail, nasasakitan an mga paraoma na mabawi an saindang mga gastos sa produksyon mantang padagos na apektado an mga konsumidores kan halangkaw na presyo kan mga pangenot na kakanon. Susog sa mga bareta, an sitwasyon na ini nagpapahiling nin bakong balanseng dalagan kan ingreso sa rice supply chain.
Katakod kaini, tinatawan nin atensyon an padagos na pagsarig sa imports asin an operasyon kan mga programa arog kan KADIWA Centers, kun saen may mga bareta na ipinapabakal sa mas baratong presyo an mga imported rice. Para sa nagkapirang sektor, ini nagpapahiling nin kakulangan nin panhaloyan na solusyon para sa lokal na produksyon nin bagas.
Mientrastanto, orog pang pinapagrabe an kamugtakan kan mga paraoma huli sa paglangkaw kan gastos sa abono asin lana, na sinasabing nag-aabot na sa 50%, siring man an huma kan El Niño na posibleng mabawasan an ani sa mga masunod na bulan. Huli kaini, an nagkapira napipiritan na bawasan an gastos sa pag-oma, na nagbubunga nin mas hababang ani.
Sa pankagabsan, an manlaen-laen na sektor naghahagad nin mas mahiwas na suporta para sa mga paraoma, kabali an magkakanigong subsidiya, modernisasyon kan agrikultura, asin pagbawas kan gastos sa produksyon. Katuyuhan kaini na mapakusog an lokal na industriya nin paroy asin masiguro an seguridad sa pagkakan sa nasyon.
