NAGA CITY- Pigsierto kan Camarines Sur Police Provincial Office na malalaoman an saindang mga personahes kasabay kan pag-obserbar kan Semana Santa.
Katakod kaini, sigun ki PCPT. Liza Jane Alteza, Spokesperson kan CSPPO, marhay an salud kan kada miyembro kan saindang hepatura orog na an mga naka-deploy sa mga area of convergence.
Dugang pa kan opisyal, padagos an pigsasagibong monitoring asin pagbabantay kan mga kapulisan sa probinsiya kan Camarines Sur tanganing mamantinir an seguridad asin katuninongan sa bilog na lugar.
Antes pa man an deployment kan mga ini sa saindang kanya-kanyang area of responsibility pigsierto na an magayon na salud kan mga kapulisan asin pirme soboot pigpagirumduman na magdara asin mag-inom nin kadakol na tubig tanganing makalikay sa mga helang asin anuman na epekto kan halangkaw na heat index.
Nagpapakol kaya sa 40 degree celcius an namamatean na init kan panahon sa probinsiya kan Camarines Sur na peligroso sa salud kan publiko.
Mientrastanto, sa presente an mga pulis an mahihiling sa pigtalagang motorist assistance center sa kada na preparadong magtao nin seguridad, magtao nin tabang sa anuman na kariribukan asin aksidente.
