NAGA CITY – Kaipuhan nin dakulang pondo sa underground cabling na planong isagibo kan nakalihis na administrasyon sa siyudad nin Naga.
Sa entrevista kan Bombo Radyo Naga ki Rinner Bucay, Spokesperson kan CASURECO II, sinaysay kaini na nagkaigwa nin pag-urulay sa pag-ultanan kan nasambitan kooperatiba asin lokal na gobyerno kan Naga magin an mga Telcos o mga telecommunications companies.
Dugang pa kaini, na sa enot na kabtang kan pag-urulay dae pa kabali an CASURECO II, alagad an Telcos padagos an paghurot kan LGU Naga na kun saen yaon sa ordinansa na maibalyo na gikan sa aerial pasiring sa underground an mga linya kan nasambitan ng Telcos.
Sigun pa ki Bucay, mapadapit sa kuryente baka abuton soboot nin second to third phase, kun saen mawawalat an mga linya kan kuryente enkaso mapagplanuhan na man an pag underground kan mga linya kan kuryente.
Pigtawan-duon pa ni Bucay na dakulang pondo an kakaipuhan na makua tanganing mapangyari an nasambitan ng proyekto, kun saen sa parte man kan CASURECO II, saindang pinag-aadalan kun saen makuang pondo, asin kun mayong makukuang katuwang sinda digde, madidipisilan soboot na magibo an underground cabling.
Siring man, kaipuhan ining pa-aprobaran sa Energy Regulatory Commission (ERC) asin pwedeng makaapektar sa rates kun saen posibleng maglangkaw an taripa sa kuryente enkaso madagos na ma-implementar an nasambitan proyekto.
Mientrastanto, pigkokonsiderar man sa ngunyan kun siyudad sana nin Naga o mga konsumidores kan siyudad an mabaranga kan pag-abot sa taripa kan kuryente kan gabos na gagastuson o kabali an 9 na banwaan na sakop kan CASURECO II.
Kaya, ini man ikokonsulta pa sa ERC asin ipe-presentar digde kun ano an magigin epekto kan kaplanuhan na ini sa taripa kan kuryente.
Sa ngunyan, saro man ini sa pinag-aadalan kan kooperatiba na magkaigwa nin siring na programa alagad saro man sa dipisil, iyo an paghanap nin pondo.
