Kinondenar ni House Senior Deputy Minority Leader Leila de Lima an pagsasampa ni Davao City Rep. Paolo “Pulong” Duterte nin mga kasong cyber libel asin libel laban sa nagkapirang mamamahayag, na saiyang inapod na porma nin pananakot sa talingkas na pamamahayag.
Para ki De Lima, an siring na lakdang pwedeng gamiton tanganing pugulan an talingkas na pamamahayag asin an pagtao nin impormasyon sa publiko.
An mga kaso konektado sa mga alegasyon na ibinunyag kan sinibak na pulis na si Rodulfo Gracioso Jr.
nagpahayag si Gracioso na siya an naghahatod nin mga maleta na sinasabing igwa nin kwarta para sa pamilya Duterte.
Idinugang ni De Lima na an pagsasampa nin kasong libel laban sa sarong media network pwedeng ibilang na panggigipit sa kalayaan kan pamamahayag, orog na sa pag-uulat manungod sa mga alegasyon nin korapsyon.
Imbes na magkaso, mas marhay kuta na simbagan kan mga kinauukulan an mga alegasyon, orog na kun hinahagad kan media an saindang panig.
Huli ta, parte kan paninimbagan kan sarong lingkod-bayan an pagtao nin paliwanag asin pagtugon sa mga isyu na inilalapit kan publiko.
