Nag-abot na sa apat na katawo an binawian nin buhay sa nagpapadagos na pagbulos kan uran na nagdara nin matinding pagbaha sa South Korea. Ini an makalihis na madugangan pa nin duwa an naenot nang naireport na nagadan mantang saro man an nawawara.
An mga biktimang binawian nin buhay sa kalamidad an naireport gikan sa siyudad kan Seosan sa south Chungcheong province.
An sarong naireport na nawawara an inanod sa sarong salog sa Gwangju sa timog-kanlurang parte.
Ribu-ribong residente man o kabilogang 5,192 indibidwal gikan sa 13 siyudad asin probinsiya na binaha an ipig-ebakwar na. Naraot man sa matinding mga pag-uran asin baha an 496 na public properties mantang 276 na pribadong ari-arian an naraot.
Nauktaba man an ferry service sa nagkapirang lugar huli sa magagabat na pag-uran.Kan nakalihis na huwebes, piglangkaw na kan gobyerno kan SoKor an disaster alert sa pinakahalangkaw na lebel, komo “serious” tanganing masimbagan an naghehewas pang danyos dara kan nagpapadagos na magagabat na pag-uran.
An mag naikurit na pag-uran man sa laog sana kan sarong oras na 114.9 mm (4.5 inches) an maikokonsiderar na pinakahalangkaw na naikurit puon kan nakalihis na taong-1968.
