Nagpakol na sa 150 an naireport na binawian nin buhay huli sa panlalamasa kan nag-agi na bagyong Kristine asin bagyong Leon basado sa datos kan Naional Disaster Risk Reduction and Management Council (NDRRMC) ngunyan na aldaw nin Huwebes, Oktubre 31.
Segun sa ahensiya, kadakle sa mga ini, huli sa panlamasa kan bagyong Kristine na pigkunsiderar na deadliest asin mapaminsalang bagyo na nagtam sa nasyon ngunyan na taon.
Sa Batangas na saro sa pinakamatinding nadanyaran kan bagyong Kristine, nasa 59 an nagadan kadakle huli man sa landslide dara kan mga pag-uran.
Kan nakalihis na Huwebes, alagad naghupa na an mga baha sa probinsiya, igwa pa man liwat nin 3,000 pamilya o katampad kan 11,000 indibidwal an nagtitinir sa 70 evacuation centers.
Nagsagibo na man nin preemptive evacuation sa mga residente sa mga banwaan kan Agoncillo, San Luis, Alitagtag siringman sa Lipa City huli sa piglalaoman na epekto kan bagyong Leon.
Nakakurit man an ahensiya nin 115 katawo na nalugadan sa pinaghalong epekto kan 2 bagyo mantang igw nin 29 na indibidwal an nagtitinir na nawawara.
Sa kabilugan, nagtitinir pa man ang daan-daang pamilya sa mga evacuation shelter sa manlaen laen na lugar sa nasyon asin nasa 1.892 milyong pamilya an naapektaran na kan hagupit kan 2 bagyo sa 81 probinsiya.
