Nagtitinir sa 0.4% an case fatality rate kan dengue sa Pilipinas, o katampad kan 4 na binabawian nin buhay sa kada 1,000 kaso, susog sa Department of Health (DOH).
Sigun ki DOH Spokesperson Albert Domingo, obheto kan ahensya na dagusang wakasan an mga nagagadan huli sa dengue, kasunod kasunod kan paglangkaw nin mga kaso kan nakalihis na taon.
Basado sa datos kan ahensya, Enero hasta bulan nin Marso 2025, nakapagrehistro an nasyon nin 62,313 dengue cases kun saen 73% na mas halangkaw kumparar sa parehong panahon kan nakalihis na taong 2024.
Pinakahalangkaw an numero sa mga rehiyon kan Calabarzon, NCR, asin man Central Luzon.
Nagbaba man an case fatality rate sa 0.35% ngunyan na taon gikan sa 0.42% kan nakalihis na taong 2024.
Patanid man kan DOH na tulos kumonsulta sa doktor enkaso magluwas an enot na senyales kan dengue.
Kadaklan kaya sa mga binabawian nin buhay iyo an dae tulos natatawan nin tamang lunas. Importante an hydration o pagtatao nin suwero sa mga pasyente.
Mientrastanto, nilinaw man ni Domingo na dae maapektaran an serbisyo kan PhilHealth sa ibong kan isinasagibong restructuring sa ahensya.
