Pigtawan-duon kan Department of Education (DepEd) Camarines Sur an importansya kan pahintulot kan mga magurang o legal na tagapag-ataman antes maibali an mga estudyante sa School-Based Deworming Program.
Sa intrevista kan Bombo Radyo Naga kay Atty. Salvador “Bogs” Pelingon, Division Information Officer kan DepEd-Camarines Sur, sinabi kaini na importante an parental consent tanganing masierto na may bastante na impormasyon asin pahintulot an mga magurang antes an Deworming Activity kan saindang mga aki.
Segun ki Pelingon, an programa may obhetona maprotektahan an salud kan mga estudyante sa paagi sa paglikay asin pagkontrol sa Intestinal Worm infection na pwedeng makaapektar sa saindang nutrisyon, pagdakula, asin kakayahang makapag-adal nin marhay.Dugang pa an marhay na lawas kan mga aki importante na salik sa mas epektibong pag-adal.
Segun pa ki Pelingon na antes an programa, naghahatag an mga eskwelahan nin impormasyon sa mga magurang dapit sa obheto k, proseso, asin mga benepisyo kan deworming. Kaiba kaini an pagheras nin Consent Forms na dapat pirmado bilang katunayan kan saindang pagtugot. Sa paaging ini, may pagkakataon an mga magurang na maghayag nin ano man na mga impormasyon sa kamugtakan kan salud kan aki antes an pagsairarom sa Deworming.
Pigtawan linaw man ni Pelingon na an partisipasyon kan sarong estudyante sa deworming program nakadepende sa pahintulot kan saiyang magurang. Dugang pa ni Pelingon na ginagalang kan DepEd an karapatan kan lambang pamilya na magdesisyon base sa saindang pag-intindi asin konsultasyon sa mga propesyonal sa salud.
Ipinatutupad an programa sa pakikipagkoordinar kan Department of Health (DOH), mga lokal na gobyerno, asin iba pang katuwang na ahensya tanganing masierto an ligtas asin organisadong implementasyon kaini sa mga pampubliko asin pribadong eskwelahan. Padagos man na sinusunod an mga nag-iiral na health asin safety protocols sa paglatag kan deworming medicine asin sa pag-ataman sa kapakanan kan mga estudyante.
Nagpagirumdom man si Pelingon sa mga magurang na basahon nin marhay an mga impormasyong ipinapadara kan eskwelahan asin makipag-ugnayan sa mga paratukdo o opisyal kan eskwelahan kun may mga kahaputan sa programa. Importantes suboot bukas na komunikasyon sa pag-ultanan kan eskwelahan asin mga magurang tanganing magin epektibo an mga programang pansalud para sa mga estudyante.
Padagos man an pangapudan kan DepEd sa mga magurang asin iba pang stakeholder na suportahan an mga programang nagmamawot na maprotehiran an salud asin kapakanan kan mga estudyante, mantang pigsisierto na an gabos na lakdang an isinasagawa sunod sa nag-iiral na mga polisiya asin may pagrespeto sa karapatan kan lambang pamilya.
