NAGA CITY- Pigsaysay kan pamayuhan kan Department of Education Camarines Sur na nagpapadagos pa an pagsumiter kan mga eskwelahan sa elementary asin sekondarya nin report dapit sa kamugtakan kan saindang mga pasilidad makalihis an panlalamasa ni Bagyong Uwan.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd Camarines Sur, sinaysay kaini na mayo pa sindang eksaktong numero kan mga eskwelahan na nadanyaran kan nakalihis na bagyo orog na ta mayo pang kuryente asin internet sa ibang lugar.
Sigun ki Pelingon, an eastern part kan Camarines Sur partikular an coastal areas siring kan San Jose, Sañgay, Lagonoy, Caramoan, Siruma asin Tinambac an igwang reported na naraot siring kan nahalian nin atop asin nalaugan nin tubig.
Alagad mayo pa man nin eksaktong numero sa mga nadayaran.
Apwera digde, an pinakadakula man na esklwelahan sa Nabua an babad pa sa tubig hasta sa presente kun kaya padagos an paglalapigot kan pamayuhan na masimbagan ini.
Mientrastanto, liwat man na pigtawan duon ni Pelingon na an mga school heads an pwedeng magsupender nin Face-to-face classes para sa kasalbaduhan kan mga estudyante asin mga paratukdo.
Kaipuhan sana soboot na magpa-abot nin report sa Division Office tanganing makapagtao man nin magkakanigong asistensiya.
Sa ngunyan, hagad na sana kaini an kooperasyon kan gabos para sa mas marekas na pagsimbag sa mga pangangaipuhan sa lado kan edukasyon.
