NAGA CITY- Liwat na pigtawan duon kan pamayuhan kan Department of Education Camarines Sur na dapat boluntaryo an pagbali sa ikukundusir na Christmas party sa mga eskwelahan.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd Camarines Sur, sinaysay kaini na dapat nag-agi sa meeting, napag-ulayan an mga dapat na gibuhon antes an pagkundusir nin pagtiripon.
Sigun ki Pelingon, importante na malinaw sa gabos an saindang gigibuhon kabali na an mga dapat na itaong contribution, presentation asin iba pa.
Dugang pa kan opisyal, dae dapat piriton an mga estudyante asin paratukdo na magbali sa nasambitan ng aktibidad.
Pigsaysay pa ni Pelingon na dapat pairalon an common sense o logic orog ta na guided naman an kada saro kan mga panundunan.
Siringman dae soboot paglingawan an mga naapektaran kan mga naglihis na bagyo sa pagselebrar kan kapaskuhan.
Sa ibong na lado, pigsaysay man ni Pelingon na nagpapadagos an school-based feeding program sa bilog na Camarines Sur.
Obheto kaini na matabangan an mga kaakian na magkaigwa nin malusog na lawas na kaipuhan kan mga ini sa pag-aadal.
Kabali sa mga pigtatao iyo an gatas, bagas, healthy snacks asin iba pa. Ini an para sa gabos na mga estudyante na madurar nin haros anom na bulan.
Sa ngunyan, pig-enkaminar na sana ni Pelingon an mga estuyante asin paratukdo na gibuhong makahulugan an pagselebrar kan kapaskuhan ngunyan na taon.
