NAGA CITY – Pinag-aadalan pa kan DepEd-Iriga an pagakakaigwa nin shifting kan klase sa saindang debisyon, mantang padagos pa man soboot an saindang pag-akseptar kan mga late enrollees.
Sa entrevista kan Bombo Radyo Naga ki Dr. Mariano De Guzman, School Division Superintendent, DepEd-Iriga, sinayasay kaini na dae man malilikayan an pagkakaigwa nin late enrollees kaya padagos pa man an saindang pag-ako sa mga ini huli man ta igwa soboot kanya-kanyang rason an mga estudyante kaya nahuhuri sa pagpapa-enrol kun saen prayoridad man garay kan saindang dibisyon na makapag-eskwela an sarong aki.
Dugang pa kaini na mapadapit man sa shifting kan klase, kadalasan nangyayari sana ini kun kulang an classrooms asin sa parte kan saindang dibisyon dae pa man piggigibo ini.
Mientrastanto, sigun pa ki De Guzman na saro sa mga strategies na gigibuhon kan saindang mga paratukdo ngunyan na nagpuon na an bagong school year iyo an participative kun saen dapat an mga estudyante an dae sana nagdadangog dapat kabali an mga ini sa pag-panday kan leksiyon, siring man dapat aktibo an mga ini, nagtataram asin nagsusurat sa laog kan klase bako sanang nakatukaw tanganing mas kadakol manuodan an mga kaakian.
Sa ngunyan pagiromdom na sana ni De Guzman orog na sa mga magurang na dapat magkaigwa nin magayon na relasyon sa saindang mga aki, huli man ta an mga aki an pinaka-importanteng sektor pag-abot sa edukasyon.
Siring man para sa mga kaakian, na kun pigtawan nin tyansa na makapag-eskwela orog na libre ini sa mga pampublikong eskwelahan, dapat soboot ining samantalahon asin magpadagos sana.
