Nanindugan an Department of Interior and Local Government (DILG) na dae tatawan ni special treatment si dating Negros Oriental Representative Arnulfo Teves Jr.
Sigun ki DILG Secretary Jonvic Remulla, dae man tatawan nin hospital arrest an dating lehislador. Enot nang nagsairarom sa matrayumpo na medical operation sa Philippine General Hospital (PGH) an nakakulong na lehislador asin kinalaunan dagusan man pigtugotan na makaluwas sa ospital makalihis an pirang aldaw na pagtinir kaini.
Hurot ni Remulla, dae tatawan nin anuman na special treatment an dating lehislador mantang nasa laog kan kulungan.
Imbes, ikokonsiderar ini komo sarong karaniwang Person Deprived of Liberty (PDL), kun saen kun pano an pagtrato sa mga PDL na iyo kaining naabutan sa laog kan kulungan, kaparehong treatment man an itatao sa saiya, sigun sa sekretaryo.
Sa ibong kaini, pigpasierto kan sekretaryo sa Bureau of Jail Management and Penology (BJMP) na igwang nakalatag na mahigot na seguridad sa mga kulungan.
Enot nang pighagad kan kampo kan dating kongresista sa korte na ipagpauktaba paramientras an arraignment sa saro sa mg murder case kaini na dating nakatalaan mantang ini an nasa laog kan ospital.
Dagusan man na ibabalyo an schedule sa July 14, 2025.
