Nanindugan an Department of Energy (DOE) na an pag-amyenda sa Oil Deregulation Law iyo an pinaka-importanteng lakdang na dapat gibuhon kan Kongreso tanganing maprotehiran an nasyon sa biglang paglangkaw kan presyo kan langis, lalo na sa panahon nin krisis o giyera.
Sa House Committee on Ways and Means, na si Rep. Alfredo Garbin Jr. naghapot ki DOE Sec. Sharon Garin kun ano an mga emergency legislative amendments na pigrerekomendar kan ahensya tanganing masimbagan an padagos na paglangkaw kan presyo kan petrolyo.
Kabale sa mga hapot na pighapot iyo kun pabor an ahensya sa pagbuyagyag kan imbentaryo, anti-profiteering triggers, o an temporaryong pagsuspinde kan excise tax asin VAT adjustment para sa mga produktong diesel. Nagsimbag an opisyal kan DOE na dawa ngani epektibo an presenteng ley sa normal na sitwasyon, bako ining supisyente kun igwa nin international tensions asin natural asin artipisyal na kawsa kan paglangkaw kan presyo.
Aminado an sekretaryo na labi ka-vulnerable an Pilipinas huli ta tulos na namamatean kan nasyon an epekto kan global price increases. Katakod kaini, aminado si Garin na mayo sindang sapat na poder sa irarom kan presenteng ley na pugulan an hiro kan presyo bago pa man mangyari.
Apwera sa pag-amyenda sa Oil Deregulation Law, pigtutulod man kan ahensya an polisiya dapit sa unbundling asin pagpahiwas kan poder kan DOE sa industriya. Mientrastanto, narisa man kan ahensya na pigkakarkulong 20 porsyento kan total na pump price sa mga gasolinahan an hale sa excise tax.
