Nagpatanid an Department of Health (DOH) sa publiko na mag-ingat sa chronic kidney disease (CKD) makalihis na ipahiling kan datos na pigkakarkulong 36% kan mga Pilipino o saro sa kada tulong indibidwal an apektado kaini.
Segun sa DOH, an CKD sarong kondisyon na luway-luway na nawawaran nin function an kidney, na nagreresulta sa kadipisilan sa paghale kan basura asin sobrang tubig sa hawak.
Sinabi pa kan ahensya na pwedeng maapektuhan kaini an siisay man, alagad an mga may diabetes, alta presyon, obesity, family history nin kidney disease, asin an mga nagsisigarilyo o nag-iinom nin arak iyo an mas halangkaw an peligro.
Base sa report, naggastos na an PhilHealth nin poco mas o menos P27 billion para sa labi sa duwang milyon na dialysis claims sa enot na anom na bulan sana kan 2025.
Inapod kan DOH na “silent killer” an CKD huli ta parati mayo ining sintomas sa enot na yugto. Kun ini naggrabe, tibaad makamati ka nin paghubag kan lalawgon, kamot, asin bitis, parating pag-ihi orog na kun banggi, pagkawara nin gana sa pagkakan, asin kadipisilan sa paghangos.
Bilang pag-iingat, inenkaminar kan DOH an publiko na bawasan an saindang pagkakan nin mga ultra-processed foods na halangkaw sa asin, asukar, asin preserbatibo.
An regular na pag-inom nin tubig, pag-ehersisyo, asin paglikay sa maraot na mga gawi-gawi inabisuhan man tanganing mapagdanay na marahay an salud kan mga bato.
