NAGA CITY- Nagtao nin mga tips an Department of Health Bicol sa publiko tanganing masierto na salbado asin marhay an salud kan mga tawo sa pag-obserbar kan Holy Week siringman sa summer season.
Katakod kaini, pig-enkaminar kan DOH-Bicol an publiko na padagos na sunudon an mga pigpaluwas na wellness asin safety guidelines para sa semana santa siring kan pagdadara nin payong tanganing dae ma-expose sa init, pagsulot nin komportableng mga bado enkaso mapartisipar sa Visita Iglesia asin Stations of the Cross.
Siringman tanganing makalikay sa dehydration an mga indibidwal an pig-enkaminar na mag-inom nin kadakol na tubig tanganing dae mawaran nin malay huli sa labing gutom.
Enkaso man na kaibahan an mga aki sa pagluwas, importante na igwang kaibahang mas gurang asin igwang nakabugtak na contact information sa mga bulsa kaini enkaso mawara.
Para man sa mga panata na an pagpasan nin krus o kaya an nagpapapako sa krus, kaipuhan na siertuhon na malinig an mga gamit asin tolos na linigan nin sabon asin malinig na tubig an lugad.
Mientrastanto, tangani man na malikayan an mga vehicular accidents, an DOH-Bicol, pig-enkaminar an publiko na magsunod sa batas trapiko, magin considerate sa nakakasabayan sa tinampo asin siertuhon man na nasa marhay na kamugtakan an mga behikulong gagamiton.
An mga nasambitan ng mga pagirumdom an nagkapira sana sa piglatag kan DOH-Bicol tanganing magin matuninong asin marhay an pag-obserbar kan Holy Week asin summer season.
Sa ngunyan, hagad na sana kaini an kooperasyon kan publiko tanganing malikayan an anupaman na insidente sa panahon kan kasiributan.
