NAGA CITY- Prangkang sinaysay kan Department of Health (DOH) Bicol na mayo sa gobyerno an pagkukulang sa likod kan mga nairehistrong firecracker related incidents sa Pilipinas.
Sa entrevista kan Bombo Radyo Naga ki Dr. Napoleon Arevalo, Regional Director kan DOH Bicol, sinaysay kaini na bastante an saindang pigtagamang panahon para sa saindang kampanya para malikayan na igwang mga mabibiktima nin paputok alagad talagang dae suboot nakikipagtabangan digdi an nagkakapirang mga namamanwaan.
Sigon ki Arevalo, ginibo na kan manlaen laeng ahensya kan gobyerno an gabos na saindang makakaya para mainaan an mga firecracker related incident kun kaya kampante suboot sinda na mayo sindang pagkukulang sa nasambitang resulta kan kampanya.
Sa ibong kaini, sigon ki Arevalo, haros 30% man an pigbaba kan mga firecracker related incidents sa Bicol ngonyan na taon kumparar kan nakaaging taong 2017.
