Nakapagkurit an Department of Health (DOH) nin halos triple sa paglangkaw kan mga kaso kan hand, foot and mouth disease puon kan ika-2 kan Enero hasta ika-22 nin Pebrero kan presenteng taon.
Basado sa datos kan ahensiya, nagkaigwa nin kabilogang numero na 7,598 na mga kaso kan HFMD sa mga nasambitan ng petsa.
Ini an haros tolong beses na halangkaw gikan sa numero na 2,665 na HMFD cases kan nakalihis na taon sa parehong timeline.
52% sa mga ini an gikan sa mga rehiyon kan Central Luzon, Mimaropa, National Capital Region (NCR) asin Cordillera Administrative Region (CAR).
Nasa kabilogang numero na 4,225 o katampad nin 56% kun saen gikan digde an mga kaakian na igwang edad na 4-anyos pababa mantang 2, 069 man an mga nasa edad nin 5 hasta 9-anyos.
Alagad maski bihirang makagadan an HMFD asin kusang nagrarahay, pigpagiromdom man kan DOH an publiko na marekas na magkuriyat an nasambitan ng helang kaya ugalion soboot an paghuhugas nin kamot na dapat naghahaloy nin 20 segundo gamit an sabon asin tubig.
Maglikay man paramientras soboot sa mga indibidwal na nahihilingan nin sintomas kaini o positibong igwang HMFD.
Mientrastanto, pagiromdom man kan departamento na magkonsulta tulos kun mamatean an mga sintomas siring kan kalintura, pag-abo, sipon, mouth sores, blisters sa palad asin bitis.
An mga suspected o confirmed cases man an pigpatanidan na dae magluwas sa saindang harong asin dae paramientras maglaog sa eskwelahan o trabaho.
