Nagluya an pag-uswag kan ekonomiya kan Pilipinas kan nakalihis na huring kwarter asin kabilogan kan 2025.
Sa pulong balitaan kasuodma katakod sa dalagan kan ekonomiya kan Pilipinas, pig-report ni National Statistician asin SA Undersecretary Dennis Mapa na nakaparehistro nin gross domestic product (GDP) o an kabilogang kantidad kan mga produkto asin serbisyo na piggibo sa nasyon, sa 3.0% kan nakalihis na huring kwarter kan 2025 mantang 4.4% man sa bilog na taon.
Nagluluwas na nagluya an pag-uswag kan ekonomiya sa huring kwarter asin sa kabilogan kan 2025 puon kan taong-2024 na igwang 5.3% GDP sa huring kwarter asin 5.7% man sa year-on-year growth rates.
Ini na an ikatolong sunod na taong nabigo an gobyerno na maabot an target na pag-uswag kan ekonomiya na nasa 5.5% hasta 6.5%.
Ipinaliwanag man ni Department of Economy, Planning, and Development (DEPDev) Secretary Arsenio Balisacan an nagkapirang factors na nakaapektar sa ekonomiya sa nakalihis na taon kaibahan an epekto kan mga nagtamang kalamidad sa nasyon na naghantong sa suspensiyon kan mga klase.
Inako man kan sekretaryo na nakaapektar an flood control corruption scandal sa mga negosyo asin kumpiyansa kan mga konsyumer.Komo resulta, nagluya soboot an domestic demand growth sa 0.7%kan huring kwarter kan 2025, na nagresulta sa full-year growth na 3.7% gikan sa 5.8% kan taong-2024.
Naapektaran digde an pribado asin pampublikong konstruksiyon siring man an private consumption sa nasambitan ng period.
Alagad, an mga development soboot na ini an nagdara nin short-term growth, pigtawan-duon man kan Marcos administration na kaipuhan an paglulunsar kan imbestigasyon sa flood control corruption controversy tanganing mapakusog an paninimbagan, mapahusay an kalidad kan mga proyekto asin masierto an padagos na pag-uswag sa mga masunod pang taon.
Pag-abot man sa pagsimbag sa mga danyos na igwang koneksiyon sa climate change na nakakaapektar sa ekonomiya kan nasyon, sinaysay ni Balisacan na pigapakusog na an adaptation efforts kaibahan an mga pagpepreparar sa mga kalamidad, pagapahusay pa sa early warning systems, asin pagpapakusog kan kapasidad kan state asin local weather stations.
Sigun ki Balisacan, puspusan an piggibong lakdang kan gobyerbo tanganing maibweltada an tiwala kan publiko sa paagi kan pagpapahusay sa mga serbisyo kan gobyerno na nahihiling asin namamatean kan mga Pilipino sa saindang pang araaldaw na pamumuhay.
Mientrastanto, sigun ki Sec. Balisacan, napagdesisyonan asin inendorso ki President Ferdinand Marcos Jr., kan Development Budget Coordination Committee (DBCC), na pigbibilog kan top economic managers kan nasyon, an target GDP na 5.5% hasta 6.5% para sa taong 2027.
