NAGA CITY- Pinaliwanag kan sarong abogado an mapadapit sa pagtugot kan Commission on Elections (COMELEC) sa pig-aapod na warrantless arrest sa siisay man na madadakop na nagsasagibo nin vote buying asin vote selling.
Sa entrevista kan Bombo Radyo Naga ki Atty Jerico Angelo Galves, Election Lawyer,sinaysay kaini na pigsanabing warrantless arrest an siisay man na maaktuhan o nakagibo kan nasambitan ng election offenses an pwedeng arestuhon kan mga otoridad.
Sigun ki Galves, an vote buying asin vote selling an pigkokonsederar na criminal in nature na kun saen pwedeng i-apply an rules on criminal procedure sa election offenses.
Dugang pa kan abogado, laog digde an gabos na klase kan tawo maski pa ini an kandidato, campaign manager, poll worker asin iba pa.
Susog sa Resolution No. 11104, an warrantless arrest an pagpapahewas kan kapangyarihan kan the Kontra Bigay committee asin parte pa ini kan guidelines kontra sa mga pang-aabuso kan mga resources para sa 2025 national and local elections asin an pinaka-enot na Bangsamoro Autonomous Region in Muslim Mindanao Parliamentary elections.
Marurumduman, an Vote-buying asin vote-selling an pigkokonsederar na election offenses sa irarom kan Section 262 kan Omnibus Election Code.
Sa ngunyan, pig-enkaminar na sana ni Galves an publiko na likayan na maibwelto sa siring na salang gibuhon tanganing dae mabugtak sa alanganin na sitwasyon.
