NAAPROBARAN na ni Senate President Francis “Chiz” Escudero an pagpapaluwas kan subpoena kontra sa limang kontratista asin tolong opisyal kan Department of Public Works and Highways (DPWH) tanganing piriton sindang mag-atendir sa pagdangog sa Setyembre 8 katakod kan mga iregularidad sa flood control sa manlaen-laen na parte kan nasyon.
Alinsunod ini sa rekomendasyon ni Senate Blue Ribbon Committee Chairman Senator Rodante Marcoleta, kun saen pinirmahan kan liderato kan Senado an mga subpoena ad testaficandum para sa mga minasunod:
Darcy Kimel D.J. Respicio, general manager kan Darcy & Anna Builders and Trading;
Sally N. Santos, may-ari/manager kan SYMS Construction Trading;
Pacifico F. Discaya II, authorized managing officer kan Alpha and Omega Gen. Contractor & Development Corporation;
Maritoni P. Melegrito, authorized managing officer kan Elite General Contractor and Development Corporation;
Edgardo Saggum, may kansadiri/manager kan Eddmari Construction and Trading;
Engr. Jaypee D. Mendoza, hepe kan construction division, Bulacan 1st District Engineering Office, DPWH;
Engr. Brice Ericson D. Hernandez, dating assistant district engineer, Bulacan 1st District Engineering Office, DPWH; asin
Engr. Juanito C. Mendoza, accountant III, Bulacan 1st District Engineering Office, DPWH.
Inaprubahan man ni Escudero an subpoena na nakapangaran ki Commission on Audit (COA) Chairman Gamaliel Cordoba para sa pagsusumiter kan fraud audit highlights kan ahensya katakod kan saindang pagrepaso sa mga flood control projects kan DPWH, kainbahan an mga kasimbagan kan mga responddent sa mga nanutaran.
Kan nakalihis na Lunes, pinuonan na kan Blue Ribbon Committee an imbestigasyon sa manlaen-laen na flood control projects na soboot hababa an kalidad o dae man talaga naisakatupadan.
