NAGA CITY- Bukas na soboot an mga evacuation center sa banwaan kan Lagonoy,Camarines Sur komo pag-andam sa Bagyong Pepito.
Sa entrevista kan Bombo Radyo ki Rommel Batanes, Training & Administration kan Mdrrmo Lagonoy, sinaysay kaini na preparado ng mag-ako nin mga evacuees an saindang mga designated evacuation center tanganing amay pa maakomodar na an mga residentes na nag-ibakwar.
Katakod digde, sigun sa opisyal, igwa naman pigpreparar na ayuda an LGU-Lagonoy katuwang an ibang mga ahensiya tanganing masimbagan an mga pangangaipuhan kan mga tawo.
Pigsaysay pa kaini na igwa ng nagkusang nag-ibakwar na mga residentes sa ibang barangay tanganing amay na makapag-andam sa Bagyo.
Dugang pa ni Batanes, enot naman nagpababa nin kasuguan para sa suspensyon kan klase sa gabos na lebel magin an trabaho sa government asin private sector.
Basado man sa ginibong pag-uulay kan mga magkakanigong opisina sa nasambitan ng banwaan, 24/7 an gigibuhong pagbabantay orog na kan mga rescuers.
Nakikiulay man an opisyal sa publiko na makipag-kooperar sa mga otoridad asin likayan an pakikipagtagasan nin payo sa panahon kan kalamidad.
Sa ngunyan, padagos an pagmonitor kan MDRRMO Lagonoy sa deriksyon na pigtatahak kan bagyong Pepito.
