Pira pang mga personalidad o mga opisyal kan gobyerno an pigdiin ni dating Department of Public Works and Highways (DPWH) Usec. Roberto Bernardo sa maanomalyang flood control projects.
Sa pagdangog kan Senate Blue Ribbon Committee kasuudma dapit sa katiwalian sa nasambitan na proyekto, binanggit ni Bernardo sa saiyang second supplemental affidavit sina dating Senator Grace Poe, dating senador asin Education Secretary Sonny Angara, dating DPWH Usec. Maria Catalina Cabral asin dating DPWH Sec. Manuel Bonoan na igwang kinaaraman sa isyu kan flood control projects.
Pigsaysay ni Bernardo na 20 percent an commitment o kickback gikan sa proyekto na pigtatao ki Poe sa irarom kan 2025 national expenditure program asin ini an nag-appear man sa 2025 General Appropriations Act (GAA) kun saen sarong contractor na Mrs. Patron an nagkolektar kan komisyon para sa senadora.
Binanggit ni Bernardo na si Usec. Trygve Olaivar na staff man ni Angara sa Senado an saiyang ka-transaksyon puon 2019-2024 asin an usec. an nagreseber kan deliveries para ki Angara na 12% an kantidad kan mga proyekto.
Si Cabral man soboot kaibahan si Bonoan an magkasabwat sa pagbawas, pagdagdag asin pagbububtak nin mga listahan kan proyekto sa National Expenditure Program (NEP) para sa mga government projects.
Nagreseber soboot si Cabral nin 25% na komisyon asin personal na pighatod ni Bernardo an kickback sa harong ni Cabral sa Tatalon, Quezon City.
Si Bonoan soboot an nagtatao man sa saiyang direktiba na magsumiter kan listahan para sa mga proyekto para sa 2023 hasta 2025 budget asin pigsugo man ini kan dating sekretaryo na makipag-ulay sa mga lehislador para sa mga isisingit na mga proyekto asin ini an ipo-forward ki Cabral.
Mapakol sa P5 billion kada taon o puon 2023, 2024 asin 2025 an kantidad kan mga proyekto na pigtao ki Bonoan kun saen 15 percent an average commitment o kickback na pigtatao sa sekretaryo.
Nanindugan si Bernardo sa saiyang sinumpaang salaysay na pawang katotoohan an saiyang mga binanggit digde.
