Sarong paratukdo sa Camarines Sur an naghiras kan saiyang mga angat asin pasasalamat matapos na ma-promote sa Teacher 6 sa irarom kan Expanded Career Progression kan Department of Education (DepEd).
Sa intravesta kan Bombo Radyo Naga kay Godeliva Trinidad Borela – Teacher VI, Romero Elementary School, Bula, Camarines Sur, sinaysay kaini na kabale sa mga paratukdo na nakakua nin promosyon makalihis an pirang taon na paghalat asin nagkapirang dai nagin matrayumpo na aplikasyon para sa mas halangkaw na posisyon.
Segun ki Borela, kinaipuhan niyang mag-agi sa pagsumiter nin dakul na rekisitos, written examinations, interviews asin demonstration teaching. Saro sa pinakadakulang angat iyo an sarong brownout kan aldaw bago an saiyang demonstrasyon na pagtukdo, alagad nakanompong siya nin paagi na makaya ini sa tabang kan saiyang mga katrabaho.
Nagpoon na magtukdo kan 2001, si Borela na-promote sa Teacher 2 kan 2013 asin Teacher 3 kan 2019 bago nakamit an Teacher 6 ngonian na taon kan 2026. Sinabi niya na an saiyang mga naginibohan, mga rekord sa performance, mga eksaminasyon asin mga interbyu importanteng mga bagay sa saiyang promosyon.
Inenkaminar ni Borela an saiyang mga kapwa paratukdo na dai magsuko sa ibong kan mga pag-atraso asin padagos na magpangaturugan. Plano man niyang mag-adal nin graduate para mas mapauswag an saiyang kakayahan asin mapakarhay an serbisyong itinatao niya sa saiyang mga estudyante.
