Pabor an sarong principal sa pagbalik kan corporal punishment sa mga eskwelahan, basta igwa nin malinaw na implementing rules and regulations (IRR) tanganing maseguro na dai ini maaabuso.
Sa intrevista kan Bombo Radyo Naga kay Nerio Melano Sibulo Iii (Principal, Calabanga National Science High School), mas nagin dipisil an pagmantenir kan disiplina sa mga estudyante makalihis na haleon an nasabing polisiya.
Pig-eksplikar kan principal na sa ngonian nagsusunod an saiyang eskwelahan sa magkakanigong proseso sa pagdisiplina sa mga estudyante. Sinabi niya na pigdadangog an gabos na imbwelto antes mag-implementar nin magkakanigong aksyon base sa eksistidong polisiya kan Department of Education (DepEd) asin student handbook kan eskwelahan.
Tinawan man niya nin duon na kun ibabalik an corporal punishment, dapat igwa nin malinaw na limitasyon kun anong paagi nin pagdisiplina an tinutugutan. Sinabi niya na an anuman na klase nin padusa dai dapat magcausa nin pisikal o emosyonal na danyos sa mga estudyante.
Kasunod kan insidente nin pambabadil sa sarong eskwelahan sa Tacloban City, sinabi kan principal na pinapakusog ninda an seguridad sa Calabanga National Science High School. Kabale sa mga pig-iimplementar na lakdang iyo an paggamit nin mga metal detector sa entrada kan eskwelahan asin pag-require sa mga paratukdo na mag-apply nin maximum tolerance asin tulos na i-refer an mga estudyanteng may seryosong problema sa pag-uugali sa guidance office o principal.
Sa katapustapusi, inenkaminar kan prinsipal an mga magurang na aktibong gibohon an saindang papel sa pagbilog kan disiplina kan saindang mga aki huli ta iyan minapoon sa harong. Nangapudan man ini sa gobyerno na siyasaton giraray an mga eksistidong ley tanganing magkaigwa nin balanse sa pag-oltanan kan mga deretso asin responsibilidad kan mga menor de edad mantang padagos na pinapakusog an kaligtasan asin orden sa mga eskwelahan.
