Pigtutulod ni Parañaque 2nd District Rep. Brian Yamsuan an propuestong ley na langkawan an sahod kan mga special needs education (SNed) teachers tanganing masimbagan an kakulangan nin mga paratukdo para sa mga estudyanteng igwa nin kakundian.
Sa irarom kan House Bill 5574, itataas gikan sa Salary Grade 14 pasiring sa Grade 16 an minimum salary grade kan mga SNed teachers sa mga pampublikong eskwelahan.
Katumbas ito nin basic pay na ₱45,694 kada bulan ngunyan na taon asin ₱47,829 masunod na taong 2027.
Sigon digdi, kaipuhan an sapat na bilang nin mga SNed teachers tanganing mabiyayaan nin pantay na oportunidad sa edukasyon an mga na-eskwelang igwang kapansanan.
Batay sa datos, igwang 391,089 learners with disabilities (LWDs) an naka-enroll sa public schools kan school year 2024-2025, alagad dai pa nadadakop sa 6,000 na SNed teachers an naglilingkod sa sainda.
Sinabi kan lehislador na igwang poco mas o menos 600 na bagong SNed teaching positions an ginibo kan Department of Education (DepEd) ngunyan na taon alagad dai pa napapano huli ta pig-hahalat pa an bagong qualification standards gikan sa Civil Service Commission (CSC).
Nag-apelar an lehislador sa CSC na rikasan an proseso asin sa Kongreso na ipasa an panukalang dagdag-sahod tanganing makainkaminar asin magdanay an mas kadakul na SNed teachers sa mga pampublikong eskwelahan.
