Nairehistro kan grupong Samahang Industriya ng Agrikultura (SINAG) an paglangkaw kan presyo kan sugok sa mga nakalihis na aldaw.
Sigun ki SINAG Executive Director Jayson Cainglet, naglangkaw nin P0.30 – P0.40 an farmgate price kan kada pidaso kan itlog.
Nag-laom si Cainglet na dae na ini masusundan pa sa mga masunod na semana, orog na asin kalimitan na pigrarason kan mga retailer an halangkaw na demand sa sugok kada panahon kan kapaskuhan, mantang piglilimitaran man an supply.
Pigsaysay man Cainglet, aminado an poultry industry na piglilimitaran an supply kan sugok sa mga merkado orog na kun holiday season, dae soboot akmang magkaigwa nin halangkaw na patong sa presyo kan mga sugok, tangani sanang magkaigwa nin mas halangkaw na kitaan.
Pighalimbawa kaini an hasta kwarenta sentimos (P0.40) na pigtaas kan farmgate price.
Dugang pa, dae dapat ini gamiton kan mga retailer tanganing langkawan an P1.00 hasta P2.00 an presyo kan kada pidaso kan sugok, orog na sa kasagsagan kan holiday.
Katakod kainin nag-apelar man si Cainglet sa gobierno na bantayan an bentahan kan sugok ngunyan na kapaskuhan tanganing dae labi na masakitan an mga consumer.
Pigtukdo kaini soboot an ginibo kan mga pirang retailer na pagpaparibay kan klasipikasyon kan mga paninda kun saen an mga medium pigpapabakal komo large mantang an mga small size pigpapabakal komo medium.
An sugok an saro sa mga kalimitan na piggaamit na sangkap sa mga pighandang pagkakan sa Pasko asin Bagong Taon.
