Pinili kan San Antonio Spurs komo No. 2 overall pick an Filipino-American guard na si Dylan Harper sa 2025 NBA draft.
Si Harper an nagkawat kan college basketball sa Rutgers Scarlet Knights asin saro sa mga top player kan 2024 class. Ini an sarong five-star recruit antes na dagusang pinili komo 2nd overall kan nakalihis na aldaw, June 26, 2025.
Sa saiyang pagkawat nin basketball sa laog nin pirang taon, kapot kaini an 19.4 points per game sa laog nin 32.6 mins na pagtinir sa hardcourt.
Nagigibo na man kaining umagaw nin 4.6 rebounds per game, mantang nag aabot sa apat na assists an nagigibo kaini kada nagkakawat.
Kapot man ni Harper an 1.4 steals per game asin 6 blocks per game.
Sa presente, ini an may langkaw na 6 ft 6 in asin nagkakawat komo point guard asin shooting guard. Ini man an aki kan dating NBA player na si Ron Harper na dating nakapagbulsa nin limang NBA championship.
An saiyang ina an gikan sa probinsya kan Bataan asin dating nagkawat nin college basketball sa New Orleans. Makakaibahan ni Harper an bagitong sentro na si Victor Wembanyama, saro sa mga rising star sa NBA.
Parte man kan San Antonio lineup an mga batikang guard na sinda Chris Paul asin De’Aaron Fox, kaiba an power forward asin NBA champion na si Harrison Barnes.
