NAGA CITY- Nadugangan pa an numero kan mga fireworks related incident na nairehistro sa ciudad nin Naga kasabay kan pagsabat sa bagong taon.
Sa nakuang impormasyon kan Bombo Radyo Naga, napag-araman na haros 30 minuto makalihis an pagsabat sa taong 2018, ipigdalagan sa Naga City Hospital an sarong 21-anyos na lalaki hale sa barangay Balatas, makalihis na maputukan ini kan pigpapangalad na paputok na piccolo sa saiyang mata.
Naputukan man nin paputok an sarong 12-anyos na aki hale sa barangay Peñafrancia na ipigdalagan man sa nasambitang ospital.
Sa kabilugan, nag-abot sa tolo an nairehistrong kaso kan fireworks related incident sa ciudad nin Naga asin saro man sa probinsya nin Camarines Sur.
Enot kaini, pigdalagan man sa ospital an 13-anyos na aki hale sa barangay Concepcion Pequeña sa ciudad nin Naga makalihis na maputukan nin piccolo sa saiyang tuong kamot mantang nagsapo man nin lugad sa duwang guramoy an 10-anyos na aking lalaki hale sa banwaan nin Minalabac, Camarines Sur makalihis na maputukan man nin piccolo nagkapirang oras antes an pagsabat sa taong 2018.
