Pigbatikos kan grupong Samahan ng mga Ex-Detainees Laban sa Detensyon at Aresto (SELDA) an soboot ‘VIP treatment’ na pigtatao ki Kingdom of Jesus Christ founder asin senatorial candidate Apollo Quiboloy.
Ini an kasunod na man kan pagpapaluwas sa recorded campaign message ni Quiboloy sa proclamation rally kan Partido Demokratiko Pilipino-Lakas ng Bayan (PDP-Laban) kan nakalihis na semana.
Sigun sa grupo, an nasambitan ng lakdang an patunay kan soboot double-standard na pagtrato kan gobyerno sa mga detainees.
Hapot ni SELDA vice chairman Danilo dela Fuente, hadaw natatawan nin pagkakataon si Quiboloy na makapagrecord nin campaign video gayong an ibang mga preso an kaipuhan magsunod sa mga istriktong panundon sa laog kan kulungan.
Sigun ki Dela Fuente, an mga nagtitios na detainees asin mga political prisoners an kaipuhan magsunod sa mga istriktong panundon mantang an mga igwang kwarta asin mga makapangyarihan an nakakakua nin special treatment.
Komo kasimbagan, sinaysay ni Bureau of Jail Management and Penology spokesman Supt. Jayrex Bustinera na an nasambitan ng video an legal na kinua o pigrecord.
Sigun ki Bustinera, ipinagbabawal kan BJMP an dae otorisadong pag-record o piggamit kan mga camera sa laog kan mga kulungan.
Siring man, igwa soboot court order tanganing makapag-record si Quiboloy kan saiyang mensahe maski na ini an nakakulong asin kaipuhan magsunod digde an BJMP.
Sigun ki Bustinera, an video ni Quiboloy an kinua mantang ini an naka-confine sa Pasig City General Hospital asin bako sa laog kan saiyang detention facility.
Enot na ipinaluwas an video kan kontrobersyal na pastor sa rally kan PDP-Laban sa Ynares Sports Arena sa Pasig City.
Sigun man ki Atty. Israelito Torreon, an legal councel kan nakakulong na kandidato, kapot pa man ni Quiboloy an saiyang mga civil asin political rights komo sarong kandidato sa eleksiyon.
