Binawi kan dating suldado asin dating security aide kan dating Ako Bicol Party list na si Rep. Zaldy Co an saiyang dating testimonya na nagdeliver suboot nin mga maleta nin cuarta sa harong ni dating House Speaker Martin Romualdez.
Sa saiyang bagong affidavit, sinabi niya na pigpirit sana siya na sabihon na nagtransport siya nin kwarta hale ki Romualdez karibay nin kwarta asin scholarship para sa saiyang mga aki.
Sigon ki Guteza, ipinadara suboot ini sa sarong Japanese restaurant harani sa Senado ni Senador Rodante Marcoleta asin ni dating AnaKalusugan Party list Rep. Mike Defensor kun saen naghahalat na nin preparadong affidavit.
Sinabi pa kaini na an draft kan affidavit na saiyang babasahon pigpreparar daa kan manugang na lalaki ni Defensor na inaapod sana niyang “Mark.”
Marurumduman na kan Setyembre 25, 2025, si Guteza sarong sorpresang testigo sa hearing kan Senate Blue Ribbon Committee na pinangenotan kaidto ni Marcoleta.
Pag-eksplorar kan mga Produktong Kultural kan Sur-subangan na Asya
Sa saiyang enot na testimonya, sinabi kaini na parte siya kan security team ni Co na nagdedeliver suboot nin mga maleta nin cuarta para ki Romualdez.
Alagad sa saiyang bagong affidavit, sinabi ni Guteza na bago an hearing, pinagirumdom pa ngani siya ni Marcoleta na dae maglihis sa dati niyang affidavit.
Matapos an hearing asin mawaran suboot siya nin kontak sa mga tawong nangako saiya, sinabi ni Guteza na narealisar niya na ginagamit sana siya.
Huli kaini, sinabi kaini na nagbabasol siya sa saiyang papel asin naghagad nin dispensa sa saiyang pamilya.
An testimonya na itinao ni Guteza parte kan pig-aadalan na evidencia kan Office of the Ombudsman para sa posibleng reklamo kontra ki dating Speaker Romualdez.
Mientrastanto, pighahalat pa kan Office of the Ombudsman an kopya kan bagong affidavit ni Guteza bago magkomento.
Afuera ki Guteza, apat pang dating security aides kan Zaldy Co an enot na nagbawi kan saindang mga pahayag laban ki Romualdez asin iba pang personalidad.
Padagos an pakikipag-ugnayan kan Bombo Radyo ki Sen. Marcoleta asin Defensor para makuanan sindag lado dapit sa mga alegasyon ni Guteza.
