NAGA CITY- Nagpuon na an harvest season kan mga paraoma sa banwaan nin San Fernando, Camarines Sur.
Sa entrevista kan Bombo Radyo Naga ki Allan Salvador Head kan Municipal Agriculture Office kan Lgu San Fernando, sinaysay kaini na igwa nang mga local farmers sa saindang banwaan na nagpuon na sa saindang pag-ani kan mga paroy orog na ta pig-aantisirapan an mas orog pang malala an init kan panahon na mamamatean sa masunod na mga aldaw.
Alagad igwa man nagkapira na mga paraoma an nahuri sa pagtatanom orog na an mga harani sa Bicol River basin asin mga naapektaran kan pag-uuran.
An mga ini an naghahalat kan reproductive stage kan paroy antes na pwede nang maani sa mga masunod na aldaw o bulan.
Mientrastanto, pig-ako man kan opisyal na dae gabos nasusuplayan nin tubig gikan sa irigasyon nin huli ta kadakol pa man areas sa saindang lugar na kulang sa tubig an saindang omahan orog na ngunyan na naglaog na an tag-init.
Huli kaini padagos an pangapudan ka opisyal na magpuon na sa pagtipid sa paggamit kan tubig komo preparasyon sa peak kan labing init kan panahon.
Sa ngunyan, piglaloman na aabuton pa sa bulan nin Mayo an harvest season kan mga paraoma sa saindang banwaan.
