NAGA CITY – Nagpakol sa 4.6% an headline inflation sa Rehiyong Bikol sa 4.6% kan nakaaging bulan nin Hunyo.
Sa nagin patara-tara ni Ray Merjilla, Officer-in-Charge kan Philippine Statistics Authority Bicol, an headline inflation soboot o an paglangkaw kan presyo kan mga produkto asin serbisyo sa nasambitang rehiyon nagrikas sa 4.6% kan Hunyo, mantang kan Mayo man ngunyang taon nagpakol soboot an inflation sa 3.7%, asin 5.3% man ini kan Hunyo taong 2023. Dugang pa kaini an average inflation puon Enero hasta Hunyo ngunyang taon nagpakol sa 3.6%.
An pangenot na rason man sigun ki Merjilla kan halangkaw na inflation kan Hunyo kumparar sa kan Mayo an paglangkaw kan presyo kan housing, tubig, kuryente, gas asin iba pang fuel. Ini man soboot may 54.2% share sa paglangkaw kan pangkagabsang inflation sa rehiyon.
An pangenot man sigun igdi na nag-ambag sa paglangkaw kan inflation kan housing, tubig, kuryente, gas asin iba pang fuel an mas maluyang pagbaba kan presyo kan kuryente na may -9.6% inflation.
Nakadugang pa man soboot sa pagsakat kan inflation kan nasambitan an mas marikas na pagsakat kan presyo kan LPG, na may 16.3% inflation asin kerosene na may 11% inflation.
An panduwang rason man sigun ki Merjilla kan mas halangkaw na inflation kan Hunyo kumparar kan Mayo an mas marikas na pagsakat kan presyo kan pagkakan asin non-alcoholic beverages. Ini man soboot nagrehistro nin 7.2% inflation asin 45.9% share sa paglangkaw kan pangkagabsang inflation sa rehiyon.
Dugang pa kaini an dakulang nag-ambag sa paglangkaw kan inflation kan pagkakan asin non-alcoholic beverages an paglangkaw kan presyo kan gulay, tubers, asin cooking bananas asin iba pa na may 2.4% inflation, mga prutas asin mani na may 1.3% inflation. Saro pa man soboot sa nakadugang igdi an mas marikas na pagsakat kan presyo kan karne asin iba pang parte kan slaughtered land animals.
