Ipinagsugo ni Presidente Ferdinand Marcos Jr an masusing pagrepaso sa sakop asin hewas kan prosopwestong anti-dynasty bill.
Nangyari ini makalihis an sarong pag-urulay sa Malakanyang sa pangengenot ni Presidente Marcos kun saen pinag-urulayan an mga probisyon kan anti-dynasty bill, saro sa legislative priorities ni Presidente Marcos.
Sa press briefing sa Makanyang, sinaysay ni Presidential Communications Office (PCO) Undersecretary asin Palace Press Officer Claire Castro na obheto kan pagrerebisa asin pagrerepaso na paghusayon kun pano an prosopwestong ley an epektibong malilimitaran an political dynasties mantang nagtitinir na maipapautob.
Dugang pa ni Castro na pinag-urulayan man sa miting kun anong government positions an pwedeng sakop kan pagbabawal, magin ini an sa local, national, o sa parehong lebel, asin kun an prohibisyon o pagbabawal an maa-apply nin sabay-sabay o sunod-sunod.
Pigtawan-duon pa ni Castro na an probisyon an nagtitinir na nasa irarom kan pag-aadal asin pwedeng irekomenda sa oras na naisapinal na an konkretong balangkas.
Obheto kaini na malikayan an pag-monopolyo kan kapangyarihan kan mga political families.
Siring man tawan nin tyansa an ibang mamamayan na mamayo asin pakusugon an demokrasya asin pantay-pantay na pagtrato sa eleksiyon
Sa ibong na banda, sinaysay ni Castro na pigkokonsiderar kan administrasyon kun pano i-balanse an pig-aapod na ‘enforceability with political realities’ kaibahan na an local government dynamics.
Asin kan haputon kun igwang ‘specific recommendations’ an Presidente para sa prosopwestong ley, sinaysay ni Castro na an mismong miting an igwang obhetong i-refine an mga prosopwesto asin siertuhon na naglaladawan ini sa legislative agenda kan administrasyon.
