Arestado an sarong high-value drug personality na nabisto sa alyas na “Tagalog,” 32 anyos an edad, sa joint buy-bust operation na ginibo kan Regional Police Drug Enforcement Unit 5 (RPDEU5), Baao Municipal Police Station, PDEA, PDEG, asin PIU/PPDEU Camarines sa Sur Zone 3, Barangay Isia, Barangay Isia Hunyo 24, 2026.
Segun sa report, nadakop an suspechado makalihis magpabakal nin poco mas o menos 25 grams nin pigtutubudang shabu sa poseur-buyer kan pulis karibay nin ₱60,000 na marked money.
Sa operasyon, narekober sa suspechado an poco mas o menos 700 grams nin pigtutubudang shabu na pigkakarkulong Standard Drug Price na ₱4.76 million, kaiba an ginamit na buy-bust money, sarong .45 caliber na badil, sarong 9mm na pistola, magazines, asin mga bala.
An pagmarka asin pag-imbentaryo kan mga nakumpiskar na evidencia ginibo sa lugar kan pag-arestar sa presensya kan mga kinakaipuhan na insulating witnesses asin naitala man sa paagi kan Alternative Recording Devices (ARDs) bilang parte kan magkakanigong dokumentasyon.
Pinatanidan asin pinaaram an suspek kan saiyang deretso asin dinara sa Baao Municipal Police Station para sa magkakanigong disposisyon. An ginibong beripikasyon sa E-Warrant System, E-Booking System, asin Crime Information Reporting and Analysis System (CIRAS), nagbuyagyag na dati na siyang inaresto huli sa pagbalgar kan Republic Act No. 9165, asin an mga katumbas na kaso sa irarom kan RA 9165 asin RA 10591 pig-preparar na ngunyan.
