Tinutulan kan Office of the Public Counsel for Victims kan International Criminal Court (ICC) an apelar kan defense team ni dating Presidente Rodrigo Duterte na i-diskwalipika an saro sa tolong medical expert gikan sa panel na masuri kun “fit” an dating Presidente na maghampang sa mga paglilitis sa korte.
Sa limang dahong filing sa ICC Pre-Trial Chamber I na igwang petdang Nobyembre 10, inihayag kan Principal Counsel for Victims na si Paolina Massidda na an saiyang naenot na pag-endorso sa duwang neuropsychology expert an nakabase sa impormasyong itinap kan ICC Registry asin ini an laog sa otoridad kan Registry tanganing mantiniron an listahan kan med experts.
Pinahimutikan man ni Massidda komo mayong basehan an batikos kan depensa na nag-google search sana ini sa pagberipika sa background kan eksperto.
Nagbase sana soboot an Victims’s Office sa patas asin opisyal na selection process kan ICC Registry.Hurot pa ni Massidda na ganap na pigpapaubaya kan saiyang opisina sa discretion kan Chamber an pagdedesisyon kun ibabali an nasambitan ng eksperto sa oras na makakua nin paglilinaw gikan sa Registry.
Pinagtibay man kan Victims Counsel an saiyang posisyon na dapat magin parte an nasambitan ng eksperto sa panel tanganing matabangan an Chamber na masuri an mental asim pisikal na kapasidad ni Duterte tanganing maghampang sa trial.
Sa presente, an Pre-Trial Chamber an nagmamanehar sa mga paglilitis tanganing surion an kakayanan kan dating Presidente kan Pilipinas tanganing makiparte sa paglilitis kan kaso na igwang kinaaraman soboot sa crimes against humanity na nagibo sa irarom kan war on drugs kan saiyang administrasyon
