Nagbutwa an sarong panibagong yugto sa nasyonal na pulitika matapos na aprobaran kan Kamara de Representantes an ikaduwang impeachment kontra ki Bise Presidente Sara Duterte, kasabay kan mga pagbabago sa liderato kan Senado na konektado sa mas mahiwas na pakikipaglaban kan mga pwersa pulitikal. Mantang piglalaoman na mahampang sa impeachment trial an Bise Presidente, pigdedebatehan man an legal asin political implication kaini sa maabot na eleksyon sa 2028.
Sa intrevista kan Bombo Radyo Naga ki Atty. Michael Henry Yusingco (Political Analyst/Constitutionalist), an impeachment nag-agi sa tamang proseso sa irarom kan Committee on Justice asin dai pwedeng konsideraron na “political harassment.”
Nanindugan ini na lehitimong paggamit ini kan mekanismo na nakatalaan sa Konstitusyon, kun sain base sa mga alegasyon, may kinaaraman an reklamo sa suboot iregularidad sa confidential funds, “pagtraydor sa tiwala kan publiko,” asin isyu nin dae maipaliwanag na yaman o SALN.
Lininaw man na dae sakop kan impeachment an mga alegasyon nin assassination threats nin huli ta dae ini sakop kan kahulugan kan “halangkaw na krimen,” asin dapat darahon sa regular na korte bilang separadong kaso kriminal.
Mientrastanto, natawan man nin atensyon an pagbabago sa liderato kan Senado na pigkokonsiderar kan nagkapira na may relasyon sa mas mahiwas na political calculation. Katakod kaini, liwat na nagbutwa an isyu ni Senador Bato dela Rosa makalihis an report sa International Criminal Court (ICC), na nagpaliwanag na dae siya sakop kan parliamentary immunity sa nagkapirang seryosong kaso na may penalidad na labi sa anom na taon.
Sa boto kan Kamara, an impeachment nakaresibe nin 255 boto pabor, 26 kontra, asin 9 abstention. Susog sa mga eksperto, ini pigkokonsiderar na posibleng “opening salvo” para sa eleksyon sa 2028, na pwedeng makaapektar sa mga maabot na alyansa asin kandidatura.
An Senado piglalaoman na magtiripon sa mga masunod na semana bilang sarong impeachment court, na may 16 na boto na kaipuhan tanganing makonbikto an Bise Presidente. Mantang nagdadangadang an pagbista, asahan an lubos na pagpresentar nin ebidensya gikan sa mag-ibong na lado asin mas halangkaw na pagsiyasat kan publiko sa proseso.
