Nangapodan si Senator Erwin Tulfo sa saiyang mga kaibahan sa Senado na untokon na an hidwaan sa pulitika asin magkaigwa nin pagkakasararo sa ibong kan mga problemang kinakahampang kan nasyon.
Sigun ki Tulfo, mayong pinipili nin kolor an gutom, mahal na pagpaospital asin pagtios, ano man an panig na sinusuportahan kan mga kapwa senador.
Kaya dapat suboot na lingawan na muna an pamumulitika asin tutukan an mga problemang dulot kan krisis, arog kan kagutoman asin mga medikal na pangangaipuhan kan mga Pilipino.
An pangapodan kan senador nangyari sa ibong kan padagos na kawaran nin pagkakaisa sa Senado dahil sa dae pa maresolbaran na alitan sa liderato kan institusyon.
Tinawan doon ni Tulfo na bako suboot ining usapin kan ano man na lado, huli ta an problemang kinakahampang kan nasyon apektado an gabos.
Magin mga Marcos loyalist, Duterte supporters, asin Leni followers, sinda man an nakakaeksperyensya kan pagmahal kan presyo kan mga barakalon.
Katakod kaini, nag-apelar an lehislador sa Senado na ituon an atensyon sa saindang mandato asin untokon na an alitan. Aniya, sa panahon kan krisis, an mga lider kan nasyon dapat nagkakasararo asin dae nagkakabaranga na nagdudulot nin pagkawatak-watak sa mga Pilipino.
Tinawan doon pa kan senador na saro sana an problemang kinakahampang kan nasyon, kaya nararapat sana na magpadagos an pagkakasararo sa Mataas na Kapulungan para sa kapakanan asin interes kan taumbayan.
