Nagpromesa si Iranian Foreign Minister Abbas Araqchi na gagamiton ninda an gabos nin options tanganing ipagtanggol an saindang soberanya makalihis an nangyaring pambobomba kan Estados Unidos sa tolong nuclear facilities kaini.
Komo pagbalos, nagpakawala an Iran nin mas kadakol na missiles pasiring sa Israel kun saen apektado an siyudad kan Tel Aviv asin Jerusalem, na nagkawsa kan pagkaraot kan mga kaharongan, asin lugadan na mga sibilyan. Huli digdi, nagpakol sa 16 an nairido.
Nagpatanid an Iran na dae ini magpapasindak sa Amerika asin pig-apod an opensiba kan Estados Unidos komo iligal.
Sigun sa sainda, mayong radioactive materials an nawalat na posibleng magsabog sa mga pasilidad siring kan Natanz, Isfahan, asin Fordow.
Sa ibong na lado, pig-orgulyo ni Trump an soboot “matrayumpo” na operasyon kaini kasabay kan huma na susunodan pa ninda ini nin mas labi pang pambobomba kun dae soboot masuko an Iran.
Napag-araman na magbalos soboot an Estados Unidos nin 30 Tomahawk missiles asin mga bunker-buster bomb tanganing wasakon an nuclear facilies kan Iran.
Basado sa datos, nag-abot na sa labi 430 an naireport na binawian nin buhay sa Iran asin 24 man sa Israel puon kan magpuon an kariribukan kan Hunyo 13.
Nagpahayag nin pagkahadit an mga lider sa manlaen-laen na nasyon, mantang padagos na nag-iigting an tensyon sa Middle East.
Nangapodan an United Nations nin tulos na ceasefire tanganing malikayan an mas mahewas na giyera.
