Naglulunsar nin mga bagong lakdang an lokal na gobyerno kan syudad nin naga tanganing maresolbar an padagos na kakulangan sa suplay nin mga bulong asin mas mapamarhay an serbisyong pangsalud sa syudad.
Sa paghampang sa mga kagawad kan Media ni Leni Robredo, Naga City Mayor, ipigheras kaini na an pagpalaog nin consignment agreement sa mga City Hospitals nagresulta na sa mas episyenteng pagtagama nin bulong, huli ta igwa na nin in-house system na nag-aasikaso kun maubos an suplay.
Alagad, aminado an Alkalde na igwa pa nin kakulangan sa ibang health facilities, na iniuugnay sa limitadong kapasidad sa inventory management asin medyo halawig na procurement process na nag-aabot nin apat hasta anom na semana. Komo tugon, pinapakusog an training asin kapasidad kan mga supply officers tanganing mapadali an pagkua nin mga kinakaipuhang medisina.
Sa lado kan suplay, nagsumite man nin proposal an Ayala Health para sa paghatod nin generic medicines sa syudad. An nasabing panukala, na ginagamit na sa mga syudad kan Iloilo, Valenzuela, asin Taguig, naglalayong maseguro na dae na mauubusan nin gamot an mga pasyente, lalo na an mga indigent seniors asin persons with disabilities (PWDs).
Pig-punto man kan opisyal na dakulang hamon an kakulangan sa maayos na data management, kaya nakipag-partner na an syudad sa sarong Pharmaceutical Company tanganing mapamarhay an pagtarget asin distribusyon nin serbisyong medikal.
Sa mas halawig na plano, pinapakusog man an koordinasyon sa Bicol Medical Center tanganing mabawasan an dagsang pasyente sa Naga City General Hospital. Mawot kan LGU-Naga na mas mapakinabangan an mga health centers sa mga barangay, asin mabawasan an pila sa mga pangenot na ospital.
Kaiba man sa mga inisyatiba an pagdugang nin mga pasilidad asin kagamitan, kaiba na an mobile clinics asin mga bagong compactor trucks para sa waste management, na piglalaoman na makakatabang sa pangkagabusan na salud kan komunidad.
Pigtawan duon man ni Robredo na an mga pagbabagong ini nakatutok sa pagsierto na an mga residente asin pinaka-nangangaipuhan an enot makabenepisyo sa mga serbisyong pangsalud kan syudad.
