Ipinag-orgulyo kan House of Representatives na an sektor kan edukasyon an igwang pinakadakulang pondo sa 2026 national budget na naikurit sa historya kan nasyon.
Ipigtalaan kan House version kan 2026 General Appropriations Bill an pinakadakulang pondo para sa edukasyon na nag-abot sa ₱1.28 trilyon o 4.1 porsiyento kan Gross Domestic Product (GDP).
Ini an inihayag ni House Appropriations Chairperson Rep. Mikaela Angela Suansing.
Sinaysay ni Suansing na nagdugang an Kamara nin ₱56.6 bilyon para sa sektor kan edukasyon, na enot na beses na naglampas sa 4 porsiyentong international benchmark para sa education spending.
Dakulang parte kan dugang na pondo an pigtagama sa Basic Education Facilities Program, na maabot sa ₱63.2 bilyon asin piglalaomang mapagibo asin mapakarhay nin poco mas o menos 25,200 classrooms sa 2026.
Ganap mang pinondohan kan Kamara an Universal Access to Quality Tertiary Education (UAQTE) program, pigsisimbagan kaini an ₱12.3 bilyong kakulangan kan 114 state universities and colleges sa enot na pagkakataon puon 2017.
Maabot man sa ₱52.2 bilyon an kabilogang pondo para sa UAQTE asin iba pang schoolarship asin training programs, na makikinabang an pigkakarkulong 2.49 milyong estudyante sa bilog na nasyon sa 2026.
Sigun sa Kamara, parte ini kan mas mahewas na reporma sa badyet tanganing masierto na an 2026 budget an nagsisimbag sa pambansang prayoridad asin nagdadara nin konkretong benepisyo sa mga pamilyang Pilipino.
