Naikurit kan Philippine Institute of Volcanology and Seismology (Phivolcs) an apat na volcanic earthquakes sa palibot kan Bulkang Kanlaon sa laog kan nakalihis na 24 oras.
Gikan sa zero kan nakalihis na aldaw, naikurit kaini an apat na numero kan mga pagyugo-yugo, basado sa datos kan Phivolcs.
Padagos man na halangkaw an sulfur dioxide emission kan bulkan na nagpakol sa 3,380 tonelada kan nakalihis na Hulyo 16.
Nagtitinir man na nakalangkaw an Alert Level 3 sa bulkan, dara kan magmatic unrest o aktibidad na igwang koneksiyon sa magma.
Huli digde, pigrekomendar an pag-ebakwar kan mga residente sa laog kan anom na kilometrong danger zone.
Ipinagbabawal man an pagpapalupad nin aircraft harani sa bulkan.
Nagpatanid man an Phivolcs kontra sa mga posibleng peligro siring kan biglaang pagsabog, daloy kan lava, ash fall, rockfall, lahar sa panahon kan makukusog na pag-uran, asin pyroclastic flow.
Mientrastanto, pigreport kan Department of Social Welfare and Development (DSWD) na naglangkaw na sa 94, 737 an numero kan mga apektadong indibidwal, puon sa 94,228 asin nasa labi P195 million na man an naiheras na tabang sa mga naapektaran.
