NAGA CITY – Pigsierto kan Camarines Norte Police Provincial Office an pagbabantay sa manlaen-laen na lugar asin kan publiko katakod sa nagdadangadang na 2025 midterm election sa maabot na Lunes, Mayo 12.
Sa entrevista kan Bombo Radyo Naga ki PMAJ Marvin Hugos, PIO/Chief PCAD, Camarines Norte PPO, sinaysay kaini na sa presente nakadeploy na an mga kapulisan sa manlaen-laen na lugar sa saindang probinsya katakod kan nagdadangadang na eleksyon.
Apwera pa digdi, mas pinahigot man ninda an saindang police visibility asin igwa man sindang piglatag na boarder control sa may Cuaca asin Santa Elena.
Sigun ki Hugos, apwera sa mga personahes kan saindang hepatura, makakatuwang man ninda an mga personahes gikan sa Headquarters, asin iba pang mga personahes gikan sa manlaen-laen na ahensya na masierto sa kasalbadohan kan publiko antes, sa aldaw asin makalihis an pirilian.
Mientrastanto, apwera sa nangyaring insidente sa banwaan kan Capalonga, mayo na nin iba pang nairehistro nin insidente na igwa nin kinaaraman sa election.
Marurumdoman, kan Abril 27, duwang behikulo na piggagamit sa pangangampanya an pinaputokan an gulong.
