Naglobo pa nin 56% an mga kaso kan dengue sa Pilipinas sigun sa Department of Health (DOH).
Basado sa datos kan ahensiya, naglangkaw na sa kabilugang 43,732 kaso an naikurit puon Enero hasta Pebrero 15 kan presenteng taon.
Sa ibong man kan nakakaalarmang pagsikan kan numero kan mga tinamaan kan helang, sinaysay kan ahensiya na mas hababa pa man an presenteng case fatality ratio na 0.38%, nagbaba ini gikan sa 0.42% kan nakalihis na taon.
Katakod kaini, pinaigting man kan DOH an dengue control measures kaini asin mahigot na nakikipagtabangan sa mga local na gobierno tanganing malabanan an outbreak kan dengue sa kadaklan kan mga apektadong rehiyon katakod sa pangapodan ni Presidente Ferdinand Marcos Jr. para sa tulos na aksiyon.
Sa sarong pahayag, pigsaysay kan DOH na nanutaran an halangkaw na kaso kan dengue sa 3 rehiyon sa nasyon na katampad kan labi kabang kan mga kaso sa bilog na Pilipinas.
Ini an sa CALABARZON na may 9,113 cases, National Capital Region na may 7,551 cases asin Central Luzon na may 7,362 cases. An 17 lokal na gobierno sa nabanggit na mga rehiyon an mga dengue hotspots.
Sa ibong man soboot kan kabilogang paglangkaw kan mga kaso, nagluluwas sa datos kan DOH na nagbaba nin 5% an mga bagong kaso sa nakalihis na 4 na semana.
Nakaambag soboot digdi an mga kampaniya sa pagpapalangkaw kan kaaraman kan publiko sa helang, pinaigting pang paglilinig sa kapalibutan asin pagpuksa sa mga pinagikan kan mga namok na nagdadara nin helang na dengue.
