NAGA CITY-Pigsambit ni Senator Risa Hontiveros na an pagpapaluwas nin arrest order laban ki suspended Bamban, Tarlac Mayor Alice Guo asin pitong iba pa pigtataguyod an mandato kan Senado asin pigpapangalagaan an kapakanan kan mga Pilipino.
Sa sarong patara-tara pig-eksplikar ni Hontiveros na an pagpapaluwas nin arrest order an enot na lakdang tanganing panimbagon si Mayor Guo sa satuyang ley.
Basado sa arrest order an dai soboot pagpapahiling kaini sa Senado pig-aantala asin pigbabagatan an imbestigasyon sa napabaretang human trafficking, serious illegal detention, pisikal na pang-aabuso, asin pangtotorture sa lokasyon kan sarong internet gaming licensee kan Philippine Amusement Gaming Corporation.
An Senate committee on women na pinamamayuhan ni Hontiveros presenteng pig-iimbestigaran an mga ilegal na Philippine offshore gaming operators(Pogos).
Sa mga nagin inquiry naimbwelto an pangaran ni Guo sa POGO na pig-raid sa banwaan nin Bamban kun saen ini man an lokal na punong ehekutibo.
Pigtintaan ni Hontiveros asin Senate Presidente Chiz Escudero an walong arrest order para ki Guo asin sa saiyang mga kapamilya na sina Sheila Guo, Wesley Leal Guo, Jian Zhong Guo, asin Seimen Guo, para sa saiyang pinagsususpetsahan na ina na si Wen yi Lin, saiyang accountant na si Nancy Gamo, asin man an awtorisadong representante kan pirang POGO na si Dennis Cunanan.
Dai nag-atendir si Guo asin iba pa sa nangyaring hearing kan Hulyo 10, maski na may mga notisya gikan sa Senate committee on women.
