NAGA CITY- Pigtutubudan na pigtuyo asin bakong aksidente an nangyaring kasulo sa Barangay Igualdad, Naga City na nagresulta sa pagkatumtom kan anom na mga harong asin nadamay pa digdi an duwang iba pa.
Sa entrevista kan Bombo Radyo Naga ki SPO2 Toby Bongon, tagapagtaram kan Naga City Police Office (NCPO), sinaysay kaining igwa na sindang person of interest na iniimbestigaran katakod kan nangyaring kasulo pirang oras makalihis an pagsabat nin bagong taon.
Sigon ki Bongon, nagluluwas sa saindang inisyal na imbestigasyon na antes na mangyari an insidente, sarong lalaki suboot an nagkurahaw na susuluon niya an sarong harong sa nasambitang lugar.
Sa ngonyan, pighahanap pa kan mga otoridad an nasambitang indibidwal para sa maninigong disposisyon.
Marurumduman na alas 2:00 nin mag-uumagahon suodma kan magbungkaras an kasulo sa sarong harong sa nasambitang barangay kun saen nadamay digdi an pitong iba pa.
