Nagtao kan saindang paliwanag an Kataastaasang Hukuman dapit sa iniluwas na ‘online survey’ kan Judicial and Bar Council para sa mga aplikante kan pagka-Ombudsman.
Sa ipinadarang mensahe ni Supreme Court Spokesperson Atty. Camille Sue Mae Ting, saiyang sinabi na an pag-imbita sa publiko tangani magkumento dapit sa mga kandidato an dae na soboot bago.
Dugang pa kaini, parte sana ini kan inaapod na ‘vetting process’ sa preparasyon kan ‘shortlist’ sa mga magigin nominado sa pagka-Ombudsman na iyong isusumeter sa Presidente.
An siring na gibuhon an tangani makatabang sa Judicial and Bar Council na makaguno nin mas mahewas na ‘background’ o impormasyon dapit sa mga kandidato.
Antes pa man ginibong ‘online’, paliwanag kan nasambitan ng tagapagtaram na dati an sa paagi kan soboot mano-manong paagi o gamit an ballpen asin papel saka isusumiter.
Mantang an Judicial and Bar Council man, kasabay kan pagluluwas nin anunsyo dapit sa skedyul kan mga public interview, saindang pigheras na bukas sindang mag ako nin ano man na reklamo kontra sa mga kandidato.
An publiko an pwedeng magsunad o magsumiter kan sworn-complaint, report, o magin oposisyon sa mga aplikanteng nasa saindang listahan.
Mientrastanto, katakod pa man sa Kataastaasang Hukuman, an propesor o respondent man na si Richard Heydarian an kinumpirmang nagsumiter na kan saiyang kumento katakod sa ‘indirect contempt’ kaining kinakaatubang.
Saiyang pigsunad ini kasunod kan ipagsugo kan Korte Suprema na magkumento dapit sa petisyon ninda Atty. Mark Kristopher Tolentino asin Atty. Rolex Suplico.
Pighurot kan Richard Heydarian na dae soboot ini maapektaran kaini asin man padagos pa man sa saiyang ginigibo komo pagbito sa demokratikong pagtaram.
Katakod an nasambitan ng petisyon sa pahayag ni Heydarian mapadapit pa sa iniluwas na deklarasyon kan Kataastaasang Hukuman sa Impeachment ni Vice President Sara Duterte.
Nagtutubod kaya an mga petitioners na salungat o nakakapanraot soboot sa desisyon kan Hudikatura an inihayag ni Heydarian kansuarin sana.
