NAGA CITY- Labi sa 60 pakete kan suboot iligal na paputok an nakumpiskar kan mga otoridad sa sarong tindahan sa banwaan nin Bula, Camarines Sur.
Sa entrevista kan Bombo Radyo Naga ki PO2 Freddie Brazil Jr., imbestigador kan kaso hale sa Bula-PNP, kinumpirmar kaini na nakumpiskar sa tindahan na pag-sasadiri kan sarong Anita Raña an 19 pakete nin 5 star, 40 pakete nin pop pop asin limang pakete nin piccolo.
Nahiling suboot ining naka-display sa atubangan kan sari-sari store ni Raña kun kaya tulos man ining kinumpiskar kan mga nagpapatrolyang pulis.
Sigon pa ki Brazil, dae na sinangatan pa nin kaso an maysadiri kan nasambitang tindahan asin kinumpiskar na sana an kabilugang 64 na pakete kan pigpapangalad na paputok.
Kun marurumduman, duwang kaso nin firecracker related incident an nairehistro sa CamSur asin Naga City kasabay kan pagsabat nin Bagong Taon kun saen mga menor de edad an naging biktima kaini.
