Naglangkaw pa an numero kan mga apektado kan mga pagbaha asin magagabat na pag urang kawsa kan nakalihis na bagyong Crising, habagat, asin low pressure area (LPA).
Sa datos kan National Disaster Risk Reduction and Management Council (NDRRMC) ngunyan na Miyerkules, Hulyo 23, nagpakol na sa labi sa 1.4 milyong indibidwal gikan sa labi sa 401,000 pamilya an apektado sa gabos nin rehiyon apwera sa Eastern Visayas.
Naka-eksperyensya an mga nabanggit na lugar nin baha, pagrasay kan daga, pagrasay nin mga struktura asin mga buhawi.
Pinakamatinding naapektaran na rehiyon iyo an sa Central Luzon na may labi sa 600,000 residente an nasalanta, sinundan man ini kan Negros Island na may labi sa 166,000 asin Ilocos Region na may labi man sa 157,000 na apektadong mga residente.
Sa kabilogang numero, nagpakol na sa labi sa 21,000 pamilya an nagtitinir sa mga evacuation centers mantang an iba man na nasa labi 13,000 pamilya an nakikidagos sa luwas kan evacuation centers.
Mientrastanto, sa datos kan ahensiya, naglangkaw na sa pito an numero kan binawian nin buhay bagaman hababa ini sa datos gikan sa Philippine National Police (PNP), huli ta nagkapira sa mga nai-report na biktima kan mga kalamidad an presente pang biniberipika.
Sa ngunyan, nagkapirang lugar sa nasyon an nagsasairarom na sa state of calamity kabali an 2 banwaan sa Pangasinan na Umingan asin Malasiqui, an bilog na probinsya kan Cavite, an Malabon asin Quezon City sa Metro Manila, Roxas sa Palawan, Calumpit sa Bulacan, Sebaste asin Barbaza sa Antique, asin man Cebu City.
