CAMNORTE – Arestado an sarong lalaking parahabo sa pigsagibong hot pursuit operation kan mga otorida sa Camarines Norte.
Binisto an suspek na si alyas Bitoy, 28-anyos, walang trabaho, asin residente kan banwaan nin Mercedes, sa nasambitan ng probinsya.
Basado sa report, nangyari an panghahabon sa sarong resort sa banwaan kan San Lorenzo Ruiz kan Mayo 25.
Basado pa sa San Lorenzo Ruiz Municipal Police Station, nagpasiring sa opisina an biktimang pigbistong si Kaye, 33-anyos asin residente kan Vinzons.
Sigun sa biktima, nawara an saiyang itom na belt bag na naglalaog nin poco mas o menus P120,000, makalihis na magbweltada sa saiyang pig-uupahang villa sa nasambitan ng resort.
Basado pa sa pagsusuri kan CCTV footage kan resort, nahiling an suspek na naglaog sa villa asin kinua an nasambitan ng bag. Mientrastanto, tulos man na naarestar an suspek sa Purok 6, Barangay Hinipaan, Mercedes, Camarines Norte.
Gikan sa suspek, narekober an kabilogang kantidad nin kwarta na P70,726.
Sa pigsagibo pang legal na paghahalughog, duwang heat-sealed transparent plastic sachet na naglalaog kan pinagtutubodang shabu an nasamsam gikan sa suspek.
Sa presente, nasa kustodiya na kan pulisya an suspek asin mahahampang sa kasong panghahabon asin pagbalgar sa Comprehensive Dangerous Drugs Act of 2002 (RA 9165).
